უკრაინის შემდგომი სამხედრო მხარდაჭერა და ევროპაში უსაფრთხოების საკითხები გახდება უკრაინის პრეზიდენტ ვოლოდიმირ ზელენსკისა და ჩრდილოეთ ევროპის ქვეყნების ლიდერების განხილვის თემები დანიაში გამართულ შეხვედრაზე. ამის შესახებ დანიის მთავრობის პრესსამსახური 10 ნოემბერს იუწყება.
დაზუსტებულია, რომ დღის წესრიგის სხვა თემები იქნება უკრაინის გადაუდებელი საჭიროებები საჰაერო თავდაცვასა და ენერგეტიკული სექტორის დაცვაში. "ვამაყობ იმით, რომ შემიძლია, მივესალმო პრეზიდენტ ზელენსკისა და ჩრდილოეთ ევროპის ქვეყნების ლიდერებს დანიაში. უკრაინელების ბრძოლა თავისუფალი უკრაინისა და თავისუფალი ევროპისთვის გრძელდება. მათი დაუჯერებელი სიმამაცე და ძალა იმედის სხივია ამ მძიმე და გაურკვეველ დროს", — განაცხადა პრემიერ-მინისტრმა მეტე ფრედერიქსენმა შეხვედრის დაანონსებისას.
იმავე განცხადებაში მან დაგმო რუსეთის სიასტიკე, რომელსაც "საზღვრები არ აქვს". "სრულმასშტაბიანი შეჭრიდან თითქმის ხუთი წლის შემდეგაც გრძელდება დაბომბვები, რომლებიც მიმართულია მშვიდობიანი მოსახლეობის, საგანგებო დახმარების ცენტრების, ასევე წყალმომარაგებისა და თბოელექტროსადგურების წინააღმდეგ", — აღნიშნა ფრედერიქსენმა.
იმ დროს, როდესაც უკრაინის პრეზიდენტი ვოლოდიმირ ზელენსკი დანიაში ჩრდილოეთ ევროპის ქვეყნების სახელმწიფოებისა და მთავრობების მეთაურებს შეხვდება, არაბთა გაერთიანებული საამიროების დედაქალაქ აბუ-დაბიში უკრაინაში ომის მშვიდობიანი მოგვარების შესახებ მოლაპარაკებები გაიმართება.
უკრაინისა და რუსეთის დელეგაციებს შორის ამ შეხვედრაში შუამავლის როლში აშშ მონაწილეობს. აბუ-დაბიში ასევე იმყოფებიან NATO-ს, დიდი ბრიტანეთის, ევროკავშირისა და მისი ზოგიერთი ცალკეული წევრის, კერძოდ გერმანიის, საფრანგეთისა და იტალიის წარმომადგენლები.