აშშ-ის პრეზიდენტმა დონალდ ტრამპმა ამერიკის იუსტიციის დეპარტამენტს დაავალა, დაიწყოს გამოძიება დემოკრატიული პარტიის წევრების წინააღმდეგ, რომლებსაც მან გენერალურ პროკურორსა და სხვა თანამდებობის პირებზე "შანტაჟსა" და ზეწოლაში დასდო ბრალი. ამის შესახებ მან თავის სოციალურ ქსელ Truth Social-ში განაცხადა.
ტრამპის თქმით, შუალედურ არჩევნებში გამარჯვების შემდეგ, დემოკრატები აშშ-ის გენერალურ პროკურორს და სხვა თანამდებობის პირებს იმპიჩმენტით და დასჯის სხვა ზომებით ემუქრებიან. ის ამტკიცებს, რომ მათ ამგვარი ქმედებებისთვის საფუძველი არ გააჩნიათ. "ეს არის შანტაჟი უმაღლეს დონეზე და ისინი უნდა დაისაჯონ", - განაცხადა შეერთებული შტატების პრეზიდენტმა.
რესპუბლიკელების არჩევნებში დამარცხების შემდეგ, თეთრი სახლის შიგნით უთანხმოებები გამწვავდა, წერს Reuters. კერძოდ, კენტუკის შტატის რესპუბლიკელმა კონგრესმენმა ტომას მასიმ, რომელიც ტრამპის მიმართ კრიტიკულადაა განწყობილი, განაცხადა, რომ სურს კენჭისყრაზე გაიტანოს პენტაგონის ხელმძღვანელის, პიტ ჰეგსეტის იმპიჩმენტის საკითხი.
დემოკრატების ნაწილმა განაცხადა, რომ აპირებს საპარლამენტო გამოძიების ინიციირებას ტრამპის მიერ დანიშნული თანამდებობის პირების, მათ შორის აშშ-ის პრეზიდენტის ოჯახის წევრების მიერ ძალაუფლების ბოროტად გამოყენების ფაქტებზე.
ტრამპი ასევე ამტკიცებს, რომ დემოკრატიული პარტიის წევრები რესპუბლიკელების სპონსორებს, მათი პოლიტიკური შეხედულებების გამო, პატიმრობით ემუქრებიან. გარდა ამისა, მან მიჩიგანის შტატის სენატორი ელიზა სლოტკინი დაადანაშაულა იმაში, რომ იგი, ტრამპის მტკიცებით, ახალგაზრდა ამერიკელების დევნას აპირებს რესპუბლიკური პარტიის მხარდაჭერისთვის.