უკრაინას სჭირდება დახმარება მილიონობით ტონა მარცვლეულის ექსპორტზე გასატანად შავი ზღვის ფაქტობრივი ბლოკადის ფონზე, რაც გამოწვეულია პორტებსა და გემებზე რუსეთის შეიარაღებული ძალების უწყვეტი თავდასხმებით, ასევე 1,1 მილიარდი ევრო გაზრდილი სატრანსპორტო ხარჯების დასაფარად. ამ ზომების გარეშე, ფინანსურ სირთულეებში მყოფი ფერმერები, მომავალი სეზონისთვის თესვას ვერ შეძლებენ, რაც პრობლემას კიდევ უფრო დაამძიმებს, იტყობინება გამოცემა Politico.
უკრაინის აგრარული პოლიტიკისა და სურსათის მინისტრი ტარას ვისოცკი ამ კვირაში ვიზიტით ბრიუსელს ეწვია, რათა ევროკავშირის კოლეგებთან შავი ზღვის ნაცვლად ევროპის გავლით მარცვლეულის ექსპორტის საკითხი განეხილა. "ვითარება უკიდურესად, უკიდურესად კრიტიკულია", — ასე შეაფასა მან მიმდინარე მოვლენები.
ამავდროულად, ორმა ქვეყანამ, რომლებიც გამტარუნარიანობის გასაზრდელად ყველაზე მეტად ფლობენ შესაბამის ინფრასტრუქტურას — პოლონეთმა და რუმინეთმა — განაცხადა, რომ კიევის დასახმარებლად არაფერს მოიმოქმედებენ, აღნიშნავს Politico.
რუმინეთის სოფლის მეურნეობის სამინისტროში განაცხადეს, რომ ამ ქვეყნის ფერმერთა ინტერესები "პრიორიტეტად რჩება". უკრაინული მარცვლეულის სიჭარბე მდინარე დუნაიში წყლის დაბალ დონესთან ერთად პორტებს ტვირთავს, რაც რუმინელ ფერმერებს თავიანთი პროდუქციის გაყიდვაში უშლის ხელს, აღნიშნეს ბუქარესტში.
თავის მხრივ, პოლონეთის ინფრასტრუქტურის სამინისტრო "არ გეგმავს რაიმე ცვლილების შეტანას, რომელიც მიმართული იქნება უკრაინული სასოფლო-სამეურნეო პროდუქციის ტრანზიტის გაზრდისკენ", — განაცხადეს უწყების პრესსამსახურში.