პარაგვაის სასამართლომ თანამდებობიდან გადაყენებული პრეზიდენტი სანტიაგო პენია წინასწარი გამოძიების პერიოდით პატიმრობაში გაგზავნა. გამოძიება ეხება მის როლს საბანკო კრიზისში, რომელიც ქვეყნის რამდენიმე მილიონ მცხოვრებს შეეხო. "აუცილებელია უზრუნველვყოთ, რომ ის ქვეყანაში დარჩეს", - განაცხადა მოსამართლე უმბერტო ოტასუმ მოსმენის შემდეგ.
მანამდე ქვეყნის პროკურატურამ სახელმწიფოს ყოფილ მეთაურს ნდობის ბოროტად გამოყენებასა და სამსახურებრივი მდგომარეობის პირადი ინტერესებისთვის გამოყენებაში წაუყენა ბრალი.
პროკურატურამ პენიას, ასევე პარაგვაის ცენტრალური ბანკის ყოფილი ხელმძღვანელის, კარლოს კარვალიოს აქტივების გაყინვა მოითხოვა, რომელსაც ანალოგიური ბრალდება აქვს წაყენებული. სააგენტოს ცნობით, პენიამ სასამართლოში ჩვენების მიცემაზე უარი თქვა.
ქვეყანაში საბანკო კრიზისის მიზეზი ექსპრეზიდენტის კავშირები გახდა ბანკ Ueno-სთან, რომელიც ლიკვიდურობის პრობლემების გამო, კვირის დასაწყისში სამართავად ცენტრალურ ბანკს გადაეცა.
მას შემდეგ Ueno-ს დაახლოებით სამ მილიონ კლიენტს, რაც ქვეყნის მოსახლეობის თითქმის ნახევარია, საკუთარ ანგარიშებზე წვდომა არ აქვს. როგორც სააგენტო AFP წერს, ბანკის ცენტრალური ბანკის მმართველობაში გადასვლით ასევე დაზარალდა მრავალი საწარმო, საპენსიო ფონდი და სახელმწიფო დაწესებულება.