ევროკავშირი მოუწოდებს რუსეთს, დაუყოვნებლივ შეწყვიტოს ქიმიური იარაღის ნებისმიერი სახით გამოყენება. ამის შესახებ ევროპის საგარეო ქმედებათა სამსახურში (EEAS) უკრაინის ეროვნული საგამოძიებო სამმართველოს ანგარიშის დასკვნებზე დაყრდნობით განაცხადეს. გამოქვეყნებულ დოკუმენტში აღნიშნულია, რომ უკრაინის ფრონტის ხაზზე ქიმიური იარაღის ფორმით მასობრივი არეულობების დაშლის საშუალებების ფართომასშტაბიან და სისტემატურ გამოყენებას ჰქონდა ადგილი.
დასკვნები ცალსახაა: "ისინი დამნაშავედ რუსეთის შეიარაღებულ ძალებზე მიუთითებენ", — აღნიშნეს EEAS-ში. "ევროკავშირი მოუწოდებს რუსეთის ფედერაციას, დაუყოვნებლივ შეწყვიტოს ქიმიური იარაღის ნებისმიერი გამოყენება და დაუბრუნდეს ქიმიური იარაღის შესახებ კონვენციის სრულ დაცვას", — ხაზგასმით განაცხადეს ბრიუსელში.
დოკუმენტში ასევე მითითებულია, რომ ქიმიური იარაღის ამოქმედება ვისი მხრიდანაც არ უნდა იყოს — იქნება ეს სახელმწიფო თუ არასახელმწიფო სუბიექტი — სადმე და ნებისმიერ გარემოებაში, აბსოლუტურად მიუღებელია და საერთაშორისო სამართლის დარღვევას წარმოადგენს.
მსგავსი გამოყენების ნებისმიერი შემთხვევა საფუძვლიანად უნდა იქნეს გამოძიებული, ხოლო დამნაშავეებმა პასუხი უნდა აგონ, განაცხადეს EEAS-ში. ამასთან დაკავშირებით, ევროკავშირი მზადაა, რუსეთის ფედერაციის წინააღმდეგ დამატებითი სანქციები დააწესოს.
ქიმიური იარაღის აკრძალვის ორგანიზაციამ (OPCW) დაუყოვნებლივ უნდა გამოიყენოს თავისი მანდატი და დაადგინოს კონვენციის გამოვლენილ დარღვევებში დამნაშავე პირები, მიუთითეს ბრიუსელში.
"რეალური პასუხისმგებლობის გარეშე, ქიმიური იარაღის შესახებ კონვენცია და ქიმიური იარაღის გამოყენების ამკრძალავი გლობალური ნორმა ნდობის დაკარგვის რისკის წინაშე დგას", — გააფრთხილეს ევროპის საგარეო ქმედებათა სამსახურში.