ფლორიდის შტატის ფედერალურმა საოლქო სასამართლომ კვლავ უარყო აშშ-ის პრეზიდენტის, დონალდ ტრამპის 10 მილიარდი დოლარის ღირებულების სარჩელი გაზეთ The Wall Street Journal-ის (WSJ) წინააღმდეგ, რომელსაც თეთრი სახლის ლიდერი განზრახ ცილისწამებაში ადანაშაულებდა.
საუბარია WSJ-ისა და მისი მფლობელის, რუპერტ მერდოკის წინააღმდეგ 2025 წლის ივლისში შეტანილ სარჩელზე. ის ეხებოდა გაზეთში გამოქვეყნებულ სტატიას არასრულწლოვანთა სექსუალური ექსპლუატაციისა და ადამიანებით ვაჭრობისთვის მსჯავრდადებული ამერიკელი ფინანსისტის, განსვენებული ჯეფრი ეპშტეინისადმი გაგზავნილ მისალოც წერილზე, რომელსაც ტრამპმა მოაწერა ხელი.
თავად აშშ-ის პრეზიდენტმა არაერთხელ უარყო წერილის ავტორობა.
2026 წელს ფლორიდის სასამართლომ უკვე უარყო ტრამპის სარჩელი WSJ-ის წინააღმდეგ. თუმცა, თეთრი სახლის ლიდერის იურისტებმა მასში ცვლილებები და განმეორებითი სარჩელი შეიტანეს. ახალი გადაწყვეტილება ასევე ნიშნავს, რომ ტრამპი ვეღარ შეძლებს სარჩელის ხელახლა შეცვლასა და პირველი ინსტანციის ფედერალურ სასამართლოში თავიდან შეტანას. თუმცა, შეერთებული შტატების პრეზიდენტი ინარჩუნებს სასამართლოს დადგენილების გასაჩივრების უფლებას.
2025 წლის სექტემბერში საფოსტო ბარათის ფოტო, რომელზედაც საუბარი იყო WSJ-ის პუბლიკაციაში, გამოაქვეყნეს აშშ-ის წარმომადგენელთა პალატის წევრებმა დემოკრატიული პარტიიდან. ბარათზე გამოსახულია შიშველი ქალის სხეულის სქემატური სილუეტი, რომელზედაც დაბეჭდილია დიალოგი ჯეფრისა და დონალდს შორის. ის სრულდება ფრაზით: "გილოცავ დაბადების დღეს - და დაე, ყოველი დღე იყოს ახალი, საოცარი საიდუმლო".