CDC: ორივე დოზით აცრილებს ღია და დახურულ სივრცეებში პირბადის გარეშე ყოფნის უფლება ექნებათ

6

ორივე დოზით აცრილ ადამიანებს შეეძლებათ ღია და დახურულ სივრცეებში პირბადეების გარეშე იარონ. ამის შესახებ CNN-ის ცნობით, ამერიკის დაავადებათა კონტროლისა და პრევენციის ცენტრში (CDC) განაცხადეს და კოვიდ-გაიდლაინი განაახლეს.

„თუ სრულად ხართ აცრილი, შეგიძლიათ დაიწყოთ იმ ყველაფრის კეთება, რისი კეთების შეჩერებაც პანდემიის გამო მოგიწიათ“, – განაცხადა CDC-ის დირექტორმა როშელ ვალენსკიმ.

მისივე თქმით, აღნიშნული გადაწყვეტილება სამეცნიერო კვლევებზე დაყრდნობით მიიღეს, რომლებმაც აჩვენა რომ ვაქცინა მუშაობს.

მაგალითად, ამერიკის სამედიცინო ასოციაციის ჟურნალში გამოქვეყნებული ისრაელის კვლევის მიხედვით, ვაქცინამ სიმპტომატური კოვიდ-ინფექციის წინააღმდეგ 97%-იანი ეფექტიანობა აჩვენა, ხოლო ასიმპტომატური შემთხვევების წინააღმდეგ – 86%-იანი.

ცნობისთვის, ვალენსკის თქმით, პირბადის ტარების მოთხოვნა მოგზაურობის დროს კვლავ ძალაში იქნება, სამოგზაურო გაიდლაინები კი მაშინვე განახლდება, როგორც კი უფრო მეტი სამეცნიერო დაკვირვება გახდება ხელმისაწვდომი.

Comments
Loading...