კახა კალაძე: ელიავას ბაზრობის მეპატრონეებთან ერთად გვაქვს იდეა,იქაურობა გახდეს ევროპული დონის სავაჭრო ცენტრი

66

გენგეგმის დამტკიცების მოახლოებასთან ერთად, ელიავას ბაზრობის საკითხი ისევ გააქტიურდა. თბილისის მიწათსარგებლობის გენერალური გეგმის მიხედვით, რომელიც “სითი ინსტიტუტმა” შექმნა მერიის დაკვეთით, ელიავას ბაზრობა, მიმდებარე განვითარებები საფრთხეს უქმნის მოსახლეობის ჯანმრთელობას და გარემოს დეგრადირებას იწვევს. პროექტის ავტორები კერძო საკუთრების გადატანის და იქ რეკრეაციული ზონის გაშენების რეკომენდაციას იძლევა.

თუმცა, სულ სხვა მოსაზრება აქვს ქალაქის მერს. კახა კალაძემ ამის შესახებ კომენტარი რამდენჯერმე და ცალსახად გააკეთა. კახა კალაძემ ელიავას ბაზრობასთან დაკავშირებული კითხვის პასუხად აღნიშნა, რომ მიწათსარგებლობის გენერალური გეგმა კონკრეტიკას არ ითვალისწინებს. მისივე თქმით, გენგეგმაში წერია, რომ უნდა განისაზღვროს, როგორ და ფორმით უნდა მოხდეს ამ ტერიტორიის განვითარება.

კალაძის განცხადებით, კონკრეტულ გადაწყვეტილებას მოვაჭრეებთან შეხვედრის შემდეგ მიიღებენ. ქალაქის მერის განცხადებით, ელიავას ბაზრობის მფლობელებს თავად აქვთ სურვილი ტერიტორია ევროპული დონის სავაჭრო ცენტრად აქციონ.

“მე მგონი, ყველა ვთანხმდებით იმაზე რომ, იმ მოცემულობით ,რაც დღეს გვაქვს, ელიავას ბაზრობაზე კატეგორიულად მიუღებელია ყველასთვის. პირველ რიგში იქ, ირგვლივ მცხოვრები ადამიანებისთვის, ჩვენთვის, ქალაქის მთავრობისთვის.

ყველაფერი უნდა გავაკეთოთ იმისთვის, რომ ეს ყველაფერი იყოს მოწესრიგებული. ჩვენ გვქონდა ელიავას ბაზრობის მფლობელებთან კომუნიკაცია. ორი ალტერნატივა არის, ერთი ბაზრობის გადატანა, სხვა კონკრეტულ ლოკაციაზე და მეორე უკვე ამ არსებული ტერიტორიის მოწესრიგება, გათანამედროვება, რათა მიიღოს ნორმალური სახე, როგორც განვითარებულ ევროპულ ქალაქებშია.

მერის მოადგილის, ილია ელოშვილის განცხადებით, “ჩვენ გვაქვს ინტენსიური კომუნიკაცია ელიავას ბაზრობის მეპატრონეებთან, მფლობელებთან. ისინი არიან ძალიან გახსნილები, თავადვე გრძნობენ დისკომფორტს იმ მდგომარეობის გამო რაც შექმნილია დღესდღეობით ამ არეალში.

შესაბამისად, მათი სურვილია, გადააქციონ ეს ტერიტორია, როგორც სარეკრეაციო, ისე სავაჭრო, გასართობ, დასასვენებელ ზონად. ძალიან თანამედროვე ხედვები აქვთ ამ ადამიანებს.

თუკი ჩვენ გადავწყვეტთ იმას, რომ ეს ბაზრობა ამ არეალში ვითარდება იმ თანამედროვე ხედვებით, რომელიც გააჩნია მეპატრონეებს, ჩემი სურვილი ,რა თქმა უნდა, ყველა ჩვენგანის იქნება, არქიტექტურული კონკურსი გამოცხადდეს, ძალიან ფართო განხილვა მოჰყვეს. ეს უმნიშვნელოვანესი არეალია, შესაბამისად წავიდეთ წინ.” – განაცხადა ილია ელოშვილმა.

Comments
Loading...