თამარ ჟვანია “მრავალეროვანი საქართველოს” წარმომადგენლებს შეხვდა

309

ცენტრალური საარჩევნო კომისიის თავმჯდომარე თამარ ჟვანია  საერთო-სამოქალაქო მოძრაობა "მრავალეროვანი საქართველოს" ხელმძღვანელ არნოლდ სტეფანიანსა და საარჩევნო პროგრამის კოორდინატორ ირმა ბასილაშვილს შეხვდა.

შეხვედრის მთავარი თემა საარჩევნო სუბიექტებისთვის რიგითი ნომრის წილისყრით განაწილების საკითხი იყო. შეხვედრამდე ორგანიზაციის წარმომადგენლებმა ცესკოს წერილობით მიმართეს, რომ საარჩევნო ბლოკების შექმნისა და რეგისტრაციის პროცესის დასრულების შემდეგ საარჩევნო ადმინისტრაციამ წილისყრის პროცედურის გამართვა კოდექსით დადგენილ ბოლო ვადაში არ მოახდინოს, რაც, მათი განცხადებით, ხელს შეუწყობს საარჩევნო სუბიექტებს საარჩევნო კამპანიის თანაბარ გარემოში წარმართვაში.

როგორც თამარ ჟვანიამ შეხვედრის დასრულების შემდეგ განაცხადა,  ცესკო გამოიყენებს კანონით გათვალისწინებულ ყველა შესაძლებლობას თანაბარი კონკურენციისა და თანაბარი საარჩევნო გარემოს უზრუნველსაყოფად.

"დღევანდელ შეხვედრაზე ჩვენ ვისაუბრეთ იმ შესაძლებლობაზე, რომელიც გულისხმობს საარჩევნო სუბიექტებისთვის  ნომრების წილისყრით მაქსიმალურად ადრე მინიჭებას. რაც შეეხება ცენტრალურ საარჩევნო კომისიას,  ჩვენ ყველა საკანონმდებლო შესაძლებლობას გამოვიყენებთ რომ თანაბარი კონკურენციისა და თანაბარი გარემოს უზრუნველსაყოფად ცესკომ არ გამოიყენოს კანონით დადგენილი ბოლო ვადა, და მაქსიმალურად ყველაზე ადრე შესაძლებელ დღეს  მოვახდინოთ წილისყრით საარჩევნო სუბიექტებისთვის ნომრების განაწილება. ამის წინასწარი მზაობა ნამდვილად არის ცენტრალურ საარჩევნო კომისიაში", – აღნიშნა თამარ ჟვანიამ.

"იმდენად რამდენადაც საარჩევნო სუბიექტებისთვის ძალიან მნიშვნელოვანია თავიანთ ამომრჩევლებს დროულად მიაწოდონ ინფორმაცია თავისი რიგითი ნომრების შესახებ, ასევე მათთვის მნიშვნელოვანია წინასაარჩევნო კამპანიის წარმართვა თანაბარ გარემოში. სწორედ ეს იყო მიზეზი რომ ცესკოსთვის მოგვემართა მოთხოვნით საარჩევნო სუბიექტებისთვის რიგითი ნომრების წილისყრით მინიჭებასთან დაკავშირებით კანონით დადგენილი ბოლო ვადა არ გამოიყენონ. სწორედ ამ საკითხთან  დაკავშირებით ვისაუბრეთ და მინდა აღვნიშნო რომ საკმაოდ პოზიტიური  შეხვედრა იყო", – განაცხადა ირმა ბასილაშვილმა.

Comments
Loading...