გიორგი აბრამიშვილი: თუ კომპანია “ენკა” საქართველოსთან საარბიტრაჟო დავას წამოიწყებს, საქართველოს ასეულობით მილიონის გადახდა მოუწევს

10

საქართველოს განახლებადი ენერგიების განვითარების ასოციაციის აღმასრულებელი დირექტორი, გიორგი აბრამიშვილი აცხადებს, რომ თუ კომპანია “ენკა” საქართველოსთან საარბიტრაჟო დავას წამოიწყებს, სახელმწიფოს კომპანიისთვის ასეულობით მილიონის გადახდა მოუწევს.

რაც შეეხება კონტრაქტის შეწყვეტას, მისი შეფასებით, $800 მილიონიანი ინვესტიციის დაკარგვა ყველა სექტორის ინვესტორებისთვის ცუდი სიგნალია.

“როდესაც მთავრობა თავად აცხადებს ტენდერს, იწვევს ინვესტორებს პროექტის განსახორციელებლად, შემდეგ კი ტენდერში გამარჯვებული კომპანია, რომელმაც უკვე არაერთი ათეული მილიონი დოლარის ინვესტიცია განახორციელა პროექტში, ვერ ახერხებს სამშენებლო სამუშაოების გაგრძელებას თვეების განმავლობაში და მიდის იქამდე, რომ შეწყვიტოს კონტრაქტი, ეს ნიშნავს, რომ სავარაუდოდ, დავა მოუწევს მთავრობას კომპანიასთან არბიტრაჟის სასამართლოში და ასეულობით მილიონი დოლარით დაჯარიმდება პირველ რიგში ჩვენი ქვეყანა”,- განუცხადა აბრამიშვილმა “ბიზნეს ფორმულას”.

რაც შეეხება ზოგადად “ნამახვანჰესის” პროექტის პერსპექტივას, აბრამიშვილი ამბობს, რომ შეცვლილი პირობებითაც კი მთავრობას მომავალში ახალი ინვესტორის მოზიდვა გაუჭირდება.

“ძალიან რთულად წარმომიდგენია, რომ საერთოდ ინვესტორი მოიძებნოს ამ პროექტისთვის. ზოგადად ენერგეტიკაში დამატებით ინვესტიციების მოძიება ძალიან რთული იქნება. მაგრამ თუ თეორიულად დავუშვებთ ამას, ნამდვილად ბევრად მეტ გარანტიას მოითხოვს ინვესტორი სახელმწიფოსგან და ბევრად უფრო ძვირი დაუჯდება ქვეყანას”,- აცხადებს აბრამიშვილი.

 

 

ცნობისთვის, ENKA Renewables-ი საქართველოს სახელმწიფოთან არსებულ ხელშეკრულებას წყვეტს – 800 მილიონიანი დოლარის ჰიდროელექტროსადგური აღარ აშენდება.

“ENKA Renewables-ი, რომელშიც ENKA İNŞAAT-ი 90%-იან წილს ფლობს, საქართველოს სახელმწიფოს აცნობს, რომ მოხდეს ნამახვანის ჰიდროელექტროსადგურის კასკადის მშენებლობა-ფლობა-ოპერირების თაობაზე, 2019 წლის 25 აპრილს გაფორმებული ხელშეკრულების შეწყვეტა/გაუქმება, რის მიზეზსაც კონტრაქტით გათვალისწინებული პირობების დარღვევა და ფორს-მაჟორი წარმოადგენს”, – ნათქვამია განცხადებაში.

Comments
Loading...