მთავარი » ეკონომიკა » სახელმწიფო პროგრამის "უმასპინძლე საქართველოში" ბენეფიციარ კომპანიებთან შეხვედრა გაიმართა
სახელმწიფო პროგრამის "უმასპინძლე საქართველოში" ბენეფიციარ კომპანიებთან შეხვედრა გაიმართა
14:05 | 31 იანვარი, 2018

სახელმწიფო პროგრამის "უმასპინძლე საქართველოში" ბენეფიციარ კომპანიებთან შეხვედრა გაიმართა

საქართველოს ეკონომიკისა და მდგრადი განვითარების სამინისტროს სააგენტოს "აწარმოე საქართველოში" ორგანიზებით, სახელმწიფო პროგრამის "უმასპინძლე საქართველოში" ბენეფიციარ კომპანიებთან პირველი სექტორული შეხვედრა გაიმართა, რომელსაც  საქართველოს ეკონომიკისა და მდგრადი განვითარების სამინისტროს სააგენტოს "აწარმოე საქართველოში", ტურიზმის ეროვნული ადმინისტრაციისა და  სივრცითი მოწყობის და დაგეგმარების დეპარტამენტის, ასევე კავკასიის გარემოსდაცვითი არასამთვრობო ორგანიზაციისა (CENN) და მუნიციპალური განვითარების ფონდის  წარმომადგენლები ესწრებოდნენ.
 
ღონისძიების მიზანი სფეროში არსებული გამოწვევებისა და კერძო სექტორის  საჭიროებების იდენტიფიცირება იყო. შეხვედრაზე კერძო სექტორთან ერთად განიხილეს ის  ინიციატივები, რასაც სააგენტო "აწარმოე საქართველოში" ისახავს რეგიონებში სასტუმრო ინდუსტრიის შემდგომი განვითარების კუთხით. როგორც აღინიშნა, სააგენტოს მიზანია საქართველოს რეგიონებში დამატებითი სამუშაო ადგილების შექმნის სტიმულირება, რეგიონული ბიზნესის დივერსიფიკაცია და რეგიონებში არსებული ტურისტული პოტენციალის ათვისება.
 
ეკონომიკის სამინისტროს სააგენტოს "აწარმოე საქართველოში" მეწარმეობის ხელშეწყობის დეპარტამენტის უფროსმა, ოთარ ანთიამ დამსწრე საზოგადოებას გააცნო ის მექანიზმები, რითაც სახელმწიფო ეხმარება კერძო სექტორის წარმომადგენლებს და ისაუბრა პროგრამაში განხორციელებული ცვლილებების შესახებ.
 
"სააგენტო მუდმივ რეჟიმში ახორციელებს კერძო სექტორის წარმომადგენლებთან შეხვედრას. დღევანდელი ღონისძიება უშუალოდ ორიენტირებულია სასტუმრო ინდუსტრიაში მოღვაწე მეწარმეებზე და მათ შორის "აწარმოე საქართველოში" ბენეფიციარებზე, რომლებიც დარგის ექსპერტების მხრიდან მიიღებენ ინფორმაციას ამ მიმართულებით არსებული თანამედროვე ტენდენციების შესახებ. ჩვენ ასევე გამოვიყენებთ ამ შესაძლებლობას იმისთვის, რომ დარგში არსებული გამოწვევების შესახებ ინფორმაცია მივიღოთ კერძო სექტორის მხრიდან, რასაც შემდგომში აუცილებლად გავითვალისწინებთ იმ მხარდაჭერის მექანიზმებში, რომლებიც დღეის მდგომარეობით გაგვაჩნია", - განაცხადა ოთარ ანთიამ.
 
შეხვედრაზე გერმანიის საერთაშორისო თანამშრომლობის საზოგადოების (GIZ) მოწვეულმა ექსპერტმა, მაია წერეთელმა დამსწრე საზოგადოებას გააცნო ინფორმაცია სასტუმროს მართვასთან დაკავშირებით არსებული თანამედროვე ტენდენციების თაობაზე. ღონისძიების ფარგლებში, ბიზნესის წარმომადგენლები აგრეთვე გაეცნენ უსაფრთხოების, ნარჩენების მართვისა და ტურიზმის სფეროში არსებული თანამედროვე ტენდენციების საკითხებს.