მთავარი » ბიზნესი » ჩიკაგოს ბლოკჩეინ-კონგრესს გიორგი ვაშაძე გახსნის
ჩიკაგოს ბლოკჩეინ-კონგრესს გიორგი ვაშაძე გახსნის
16:22 | 14 იანვარი, 2018

ჩიკაგოს ბლოკჩეინ-კონგრესს გიორგი ვაშაძე გახსნის

ჩიკაგოში "ინოვაციებისა და განვითარების ფონდის" მიერ ორგანიზებული კონგრესი ჩატარდება. ბლოკჩეინ კონგრესი, ამერიკის შეერთებულ შტატებში 9 თებერვალს გაიმართება და მასში, ქართველ ექსპერტებთან ერთად, საერთაშორისო სპეციალისტებიც იქნებიან წარმოდგენილნი.

მომხსენებლებს შორის არის უკრაინის პრეზიდენტის, პეტრო პოროშენკოს მრჩეველი გიორგი ვაშაძე, ასევე "ინოვაციებისა და განვითარების ფონდის" წარმომადგენელი ამერიკაში და ღონისძიების ორგანიზატორი, გივი ჩიქოვანი.

"ბლოკჩეინ-კონგრესი "ინოვაციებისა და განვითარების ფონდის" ორგანიზებით იმართება. საერთაშორისო ექსპერტებთან ერთად, განვიხილავთ ისეთ საკითხებს, როგორიცაა ბლოკჩეინ ეკონომიკა, კრიპტოვალუტა, ბლოკჩეინის როლი მედიცინაში, დაზღვევაში და სხვა. ვისაუბრებთ, რა მომავალი აქვს ბიტკოინს და რას გვთავაზობს ის. ასევე, როგორი იქნება სამომავლოდ გადახდის მეთოდებზე მისი გავლენა. ბევრ საინტერესო თემაზე გვექნება მსჯელობა ჩიკაგოში.

მთავარი ისაა, რომ ინტერესი და ჩართულობა საკმაოდ დიდია. მოხარული ვიქნები, თუ მსგავსი სახის შეხვედრები და დისკუსიები საქართველოშიც გაიმართება. ანალოგიური პლატფორმის შექმნით, ჩვენ საშუალებას მივცემთ სხვადასხვა ქვეყანაში მოღვაწე ექსპერტებსა და დაინტერესებულ პირებს, ჩამოვიდნენ საქართველოში და ჩაერთონ პროცესში", - განაცხადა გიორგი ვაშაძემ.

შეგახსენებთ, "ინოვაციებისა და განვითარების ფონდი" რამდენიმე წელია აქტიურად მოღვაწეობს მსოფლიოს რამდენიმე ქვეყანაში. ფონდის ხელმძღვანელობითა და თანამონაწილეობით, უკრაინაში უკვე განხორციელდა არაერთი მნიშვნელოვანი რეფორმა, მათ შორის იუსტიციის სახლები - "გოტოვო". ფონდის ინიციატივით შეიქმნა ანტიკორუფციული ბიურო, რამდენიმე კვირის წინ კი მომზადდა კანონპროექტი ანტიკორუფციული სასამართლოს შექმნის თაობაზე. ფონდი, რომლის დამფუძნებლის გიორგი ვაშაძეა, აქტიურად თანამშრომლობს მსოფლიოს რამდენიმე ქვეყანასთან.