მთავარი » ეკონომიკა » ქუმსიშვილი: 2017 წლის 9 თვეში პირდაპირმა უცხოურმა ინვესტიციებმა რეკორდულ ნიშნულს მიაღწია
ქუმსიშვილი: 2017 წლის 9 თვეში პირდაპირმა უცხოურმა ინვესტიციებმა რეკორდულ ნიშნულს მიაღწია
12:05 | 20 დეკემბერი, 2017

ქუმსიშვილი: 2017 წლის 9 თვეში პირდაპირმა უცხოურმა ინვესტიციებმა რეკორდულ ნიშნულს მიაღწია

პირველი ვიცეპრემიერის, ეკონომიკისა და მდგრადი განვითარების მინისტრის განცხადებით, პოზიტიური ტენდენცია ნარჩუნდება პირდაპირი უცხოური ინვესტიციების თვალსაზრისით. ამის შესახებ დიმიტრი ქუმსიშვილმა პარლამენტში 5 კომიტეტის გაერთიანებულ სხდომაზე გამოსვლისას ისაუბრა.

მისი ინფორმაციით, 2017 წლის 9 თვეში პირდაპირი უცხოური ინვესტიციების მოცულობამ რეკორდულ ნიშნულს მიაღწია და 1,346.5 მლნ. აშშ. დოლარი შეადგინა. ამასთან, 2017 წლის მესამე კვარტალში საქართველოში განხორციელებული პირდაპირი უცხოური ინვესტიციების მოცულობა 17.6%-ით გაიზარდა და 594.5 მლნ. აშშ დოლარს გაუტოლდა.

როგორც დიმიტრი ქუმსიშვილმა აღნიშნა, ეს არის დაუზუსტებელი მაჩვენებელი, ხდება მისი შედარება წინა წლის დაზუსტებულ მაჩვენებელთან, შესაბამისად, წლევანდელი მაჩვენებლების დაზუსტების შემდეგ დინამიკა პოზიტივისკენ შეიცვლება.

პირველი ვიცეპრემიერის განცხადებით, პირდაპირ უცხოურ ინვესტიციებთან დაკავშირებით არის მოლოდინი, რომ მათი ოდენობა 2017 წელს 1 მლრდ 600 მლნ დოლარს გადააჭარბებს. როგორც ქუმსიშვილმა აღნიშნა, ეკონომიკის რეალურ სექტორში ინვესტიციების ზრდა ხელს უწყობს ახალი ტექნოლოგიების შემოტანას ქვეყანაში, ზრდის პროდუქტიულობის დონეს და პოზიტიურად აისახება ექსპორტის და დასაქმების  მაჩვენებლებზე.

მიმდინარე წლის მესამე კვარტალში მნიშვნელოვნად გაიზარდა პირდაპირი უცხოური ინვესტიციების მოცულობა ეკონომიკის რეალურ სექტორში, მათ შორის მშენებლობის სექტორში ინვესტიციები გაიზარდა 85.6%-ით და 116.2 მლნ. აშშ. დოლარი შეადგინა,  ენერგეტიკის სექტორში 75.5%-ით და 72.3 მლნ. აშშ დოლარი შეადგინა. ამასთან, მნიშვნელოვნად, 143.1%-ით გაიზარდა ინვესტიციების მოცულობა სასტუმროების და რესტორნების სექტორში და 30.1 მლნ. აშშ. დოლარი შეადგინა.

ქვეყანაში ძირითად ინვესტორ ქვეყნებს აზერბაიჯანი, თურქეთი და გაერთიანებული სამეფო წარმოადგენენ.  2017 წლის 9 თვეში აზერბაიჯანიდან განხორციელებული ინვესტიციების მოცულობამ 378.2 მლნ. აშშ. დოლარი, თურქეთიდან 259.2 მლნ. აშშ.დოლარი, ხოლო გაერთიანებული სამეფოდან 175.0 მლნ. აშშ. დოლარი შეადგინა.

დიმიტრი ქუმსიშვილმა ასევე ისაუბრა პირველ 3 კვარტალში რეინვესტირების გაზრდილ მაჩვენებლებზე. მისი ინფორმაციით, 2016 წელს, პირველ 3 კვარტალში 318 მლნ დოლარის რეინვესტირება განხორციელდა, 2017 წელს კი 591.5 მლნ, რაც 85%-იან ზრდას შეადგენს.

"რა თქმა უნდა, ეს იმ გადაწყვეტილებების შედეგია, რომელიც პარლამენტმა მთავრობასთან ერთად მიიღო, როდესაც მოგების გადასახადის რეფორმა გაატარა და ამით კომპანიები წაახალისა ბიზნესში რეინვესტირების განხორციელებისთვის", - აღნიშნა დიმიტრი ქუმსიშვილმა.