მთავარი » ბანკები » თიბისი ბანკმა EIB ჯგუფთან 94 მილიონი ევროს ღირებულების ხელშეკრულებას მოაწერა ხელი
თიბისი ბანკმა EIB ჯგუფთან 94 მილიონი ევროს ღირებულების ხელშეკრულებას მოაწერა ხელი
17:02 | 30 ნოემბერი, 2017

თიბისი ბანკმა EIB ჯგუფთან 94 მილიონი ევროს ღირებულების ხელშეკრულებას მოაწერა ხელი

თიბისი ბანკმა ევროპის საინვესტიციო ბანკის ჯგუფთან (EIB Group) 94 მილიონი ევროს ღირებულების ორ საგარანტიო ხელშეკრულებას მოაწერა ხელი.

80 მილიონი ევროს ღირებულების საგარანტიო ხელშეკრულება "ევროკავშირის დაფინანსება ნოვატორებისთვის" (InnovFin) საქართველოში ინოვაციური მცირე და საშუალო საწარმოების განვითარებას მოხმარდება. ხოლო 14 მილიონი ევროს ღირებულების ხელშეკრულება "ევროკავშირი ბიზნესისთვის" (EU4Business) ითვალისწინებს  მიკრო საწარმოების განვითარების ხელშეწყობას.

"InnovFin" საგარანტიო ხელშეკრულება დააზღვევს თიბისი ბანკის მიერ გაცემული თითოეული სესხის 50%-ს. ხოლო, მეორე საგარანტიო შეთანხმება "EU4Business" კი გაცემული სესხის - 70%-ს.

"აღნიშნული საგარანტიო ხელშეკრულებების ხელმოწერა "ევროპის საინვესტიციო ბანკის ჯგუფთან" ჩვენი კომპანიების თანამშრომლობის მნიშვნელოვანი ეტაპია. საგარანტიო პროდუქტების მოცულობა და სტრუქტურა თიბისი ბანკს საშუალებას მისცემს, ხელი შეუწყოს საქართველოში მიკრო, მცირე და საშუალო საწარმოების  დაფინანსებასა და განვითარებას. ქართულ საფინანსო სექტორში საგარანტიო საშუალებების შემოტანა მნიშვნელოვანი ფაქტორია ეკონომიკის ზრდისთვის.

მოხარული ვართ, რომ "ევროპის საინვესტიციო ბანკთან" და "ევროპის საინვესტიციო ფონდთან" ჩვენი წარმატებული პარტნიორობა გრძელდება. ვიმედოვნებთ, რომ ამ ურთიერთთანამშრომლობის ფარგლებში კიდევ უფრო მეტ გარიგებას განვახორციელებთ მომავალში",  - განაცხადა თიბისი ბანკის გენერალურმა დირექტორმა, ვახტანგ ბუცხრიკიძემ.

"ევროპის საინვესტიციო ბანკის ჯგუფის" მიერ საქართველოში მცირე და საშუალო ბიზნესის მხარდაჭერა ამ სექტორის ზრდას, კონკურენტუნარიანობასა და  კიდევ უფრო მეტი სამუშაო ადგილის შექმნას შეუწყობს ხელს", - აღნიშნა ევროპის საინვესტიციო ბანკის" ვიცე-პრეზიდენტმა, ვაზილ ჰუდაკმა.

"მივესალმები ორი საგარანტიო ხელშეკრულების ხელმოწერას საქართველოში. თიბისი ბანკი წამყვანი ქართული ბანკია, რომელიც აქტიურად აფინანსებს მცირე და საშუალო საწარმოებსა და კომპანიებს. დღევანდელი ხელშეკრულება საშუალებას მისცემს ბანკს, გააფართოვოს თავისი დაფინანსების არეალი, რაც სარგებელს მოუტანს ქართულ კომპანიებს", - განაცხადა "ევროპის საინვესტიციო ფონდის" აღმასრულებელმა დირექტორმა, პიერ ლუიჯი გილბერტმა.

"ევროპის საინვესტიციო ფონდი" "ევროპის საინვესტიციო ბანკის ჯგუფის" ნაწილია. მისი ძირითადი მისიაა ევროპის მიკრო, მცირე და საშუალო ბიზნესის მხარდაჭერაა მათთვის დაფინანსების ხელმისაწვდომობაზე დახმარების გზით.

 

"ევროპის საინვესტიციო ბანკი" ევროკავშირის გრძელვადიანი სასესხო ფინანსური რესურსის მიმწოდებელი ინსტიტუტია, რომელსაც ფლობენ ევროკავშირის წევრი სახელმწიფოები. ის ხელმისაწვდომს ხდის გრძელვადიან დაფინანსებას ჯანსაღი ინვესტიციებისთვის, რათა ხელი შეუწყოს ევროკავშირის პოლიტიკის მიზნების მიღწევას.