ირაკლი კოვზანაძე: საქართველოს საბანკო სისტემა პოსტსაბჭოთა სივრცეში  ერთ-ერთ მოწინავე ადგილზეა

ირაკლი კოვზანაძე: საქართველოს საბანკო სისტემა პოსტსაბჭოთა სივრცეში ერთ-ერთ მოწინავე ადგილზეა

"ბოლო ოცი წლის განმავლობაში საქართველოს საბანკო სისტემამ გაუძლო არაერთ ეგზოგენურ შოკს, ამავე დროს შეინარჩუნა სტაბილურობა  და სიცოცხლისუნარიანობა", - განაცხადა პარლამენტის საფინანსო-საბიუჯეტო კომიტეტის თავმჯდომარემ, ირაკლი კოვზანაძემ დღეს სასტუმრო "ბილტმორში" გამართულ საბანკო ფორუმზე სიტყვით გამოსვლისას.

"90-იანი წლების ბოლოს 200-ზე მეტი რეგისტრირებული ბანკიდან, რომელთა უდიდესი ნაწილის კაპიტალიზაცია მხოლოდ ქაღალდზე ფიქსირდებოდა, დღეს 16 ბანკი ოპერირებს, სანაცვლოდ,  მათი აქტივების მოცულობა 34 მილიარდ ლარს აჭარბებს, ორი ქართული ბანკი ლონდონის საფონდო ბირჟაზეა წარმოდგენილი. ასეთი წარმატებისთვის  ამიერკავკასიის არცერთ სხვა ქვეყანას არ მიუღწევია. საქართველოს საბანკო სისტემა, როგორც ერთ-ერთი ყველაზე მდგრადი და წარმატებული პოსტსაბჭოთა სივრცესა და აღმოსავლეთ ევროპაში, საერთაშორისო სავალუტო ფონდმა, მსოფლიო ბანკმა და, პრაქტიკულად, ყველა საერთაშორისო ორგანიზაციამ აღიარა", - განაცხადა ირაკლი კოვზანაძემ.

ამავე დროს კომიტეტის თავმჯდომარემ თავის გამოსვლაში აღნიშნა, რომ საზოგადოების დამოკიდებულება კომერციული ბანკების მიმართ არაერთგვაროვანია, რაც განსაკუთრებით ბოლო პერიოდში გამოიკვეთა. ირაკლი კოვზანაძემ განაცხადა, რომ საჭიროა, გაიმართოს მეტი დისკუსია და პროფესიული განხილვა, რათა საზოგადოებამ შეიტყოს, რა გამოწვევების წინაშეა საქართველოს საბანკო ინდუსტრია და როგორია მისი როლი ქვეყნის ეკონომიკის განვითარებაში.

"მინდა კიდევ ერთხელ აღვნიშნო, რომ საქართველოს საბანკო სისტემის ჯამური სააქციო კაპიტალი შეადგენს 4.6 მლრდ. ლარს, აქედან 90%- ქვეყანაში მოზიდული უცხოური კაპიტალია; ბანკების მიერ გაცემული სესხების მოცულობა 22 მილიარდ ლარს აჭარბებს, რაც მშპ-ის 50%-ზე მეტია. აღნიშნული  თანხით დაფინანსდა მშენებლობა, ვაჭრობა, მრეწველობა, სოფლის მეურნეობა, ჯანდაცვა და განათლება, ფიზიკური თუ იურიდიული პირები; სწორედ საბანკო კრედიტების ხარჯზე შექმნილია ასობით ათასი სამუშაო ადგილი. უშუალოდ საბანკო სისტემაში დასაქმებულია და საკუთარ ოჯახს არჩენს, დაახლოებით, 25 ათასი  ჩვენი თანამემამულე", - განაცხადა ირაკლი კოვზანაძემ.

თუმცა, თავის გამოსვლაში კომიტეტის თავმჯდომარემ ისიც აღნიშნა, რომ საბანკო სექტორსაც აქვს თავისი "სისუსტეები", რომელთა აღმოსაფხვრელად საკანონმდებლო ცვლილებები შემუშავდა.

"სახეზე გვაქვს გარკვეული პრობლემები, სისუსტეები და გამოწვევები. პირველ რიგში, ვგულისხმობ მომხმარებელთა უფლების დაცვასა და სამართლიანი კონკურენციის უზრუნველყოფას. ამ მიმართულებით საქართველოს პარლამენტმა დეკემბრის ბოლოს მრავალთვიანი დისკუსიის შემდეგ, მიიღო კანონთა პაკეტი, რომელიც არეგულირებს საბანკო ჰოლდინგების, ბანკების არაპროფილური აქტივების, მენეჯმენტის გამჭვირვალეობის, სამართლიანი კონკურენციისა და სხვა საკითხებს, ასევე დამატებით უფლებებს აძლევს ეროვნულ ბანკს საბანკო ზედამხედველობა-რეგულირების კუთხით. ეს მნიშვნელოვანი წინგადადგმული ნაბიჯი იყო საბანკო სისტემის შემდგომი სრულყოფისთვის", - განაცხადა ირაკლი კოვზანაძემ.

საბანკო ფორუმი The FINANCIAL-ის ორგანიზებით გაიმართა. ღონისძიებაში მონაწილეობას "საქართველოს ბანკის" გენერალური დირექტორი, კახა კიკნაველიძე, ეროვნული ეროვნული ბანკის ვიცე-პრეზიდენტი, მურთაზ კიკორია და საფინანსო სექტორის სხვა წარმომადგენლები იღებდნენ.

საგამოძიებო სამსახურის უფროსის მოადგილე რადას საგადასახადო კომიტეტის თავმჯდომარეს შეხვდა

საგამოძიებო სამსახურის უფროსის მოადგილე რადას საგადასახადო კომიტეტის თავმჯდომარეს შეხვდა

19 ივლისი, 2018

საქართველოს ფინანსთა სამინისტროს საგამოძიებო სამსახურის უფროსის მოადგილე იგა ზაალიშვილი უკრაინის რესპუბლიკის უმაღლესი რადას საგადასახადო და საბაჟო პოლიტიკის კომიტეტის თავმჯდომარეს,  ნინა  იუჟანინას შეხვდა. ამის შესახებ ინფორმაციას...